تعال نحاكمك وما تزعلش
تعال نحاكمك وما تزعلش
تعال نحاكمك ماتخافش
حكمنا عادل مايفرقش
ازعل مره
وماتزعلش إن الشعب مابيحبكش
جرب مره الحكم عليك
ياما حكمت غيابي علينا
واتكلمنا.....
لكن يبدو مابتسمعش
كان الشعب رهن اشارتك
تطحن فيهم وماتسألش
يالا تعال .... تعال ..... متخافش
مره نحاكمك على القطارات
واللى غرق ....أو ماغرقش
ومره نحاسبك على المساجين
الى اتخدوا فى ظلمك أفش
ولا نحاكمك على التزوير والثروات والغاز وماغازش
ولا نحاكمك على الخيانات والاهانات
والعمارات اللى انهارت نزلت دبش
فوق اهلينا وفوق العفش
قول ماتخافش
وماتزعلش
إن الشعب ما بيحبكش
كنت كاتم على أنفاسنا
عشنا فى قم قم وماعجبكش
كانت أمن الدوله سلاحك
على اللى كتب او ما كتبش
على اتعلم يوم يتكلم ولسه ما قالش
على اللى بيحلم بالحريه أو ما حلمش
يالا تعال وماتزعلش
يالا تعال فى التحرير
أصل الشرم ماينسباكش
.....ومتقلقش......
التشريفه حتبقى كبيره
زي العاده
بس المره دي بكلبش
يالا تعال ومتزعلش
وهو بالمره تزور ميدانا..... بعد الثوره
ونعد نحكي
كان ياما كان..... ولا ما كانش ؟
أبو حسين..... مات بالحسره على ضناه
وأم سالى من حسرتها ما بتنطقش
ودي صباح راح إبنها مصطفى....... مارجعش
آدي يتامى الثوره ياريس
مين يتمهم ؟ مين عذبهم ؟
قول ماتخافش ....
ومافيش كبش
الوزراء............. جوا الحبس
حكمنا عادل ما يفرقش
وماتزعلش
إن الشعب ما بيحبكش
